Høyringsinnspel Kaupanger Næringsforening

Skal Kaupanger halde fram den gode utviklinga, er det viktig at arealplanen legg til rette for ei heilskapleg utvikling av både næringsområdet og tettstaden Kaupanger. Denne balansen mellom bygda og næringslivet skapar eit godt lokalsamfunn, og denne kvaliteten er me opptekne av å ivareta og utvikle. Det er difor særs viktig for næringslivet at det vert tilrettelagt og satsa på ein god skule, god barnehagedekning og tilrettelagte bustadtomter for å få ein god synergieffekt. På mange måtar komplimenterer Sogndal sentrum og Kaupanger kvarandre, og det er ein sterk vekstakse som er viktig å ivareta og vidareutvikle, nærast unik i ein nasjonal distriktsmålestokk.

KN har på eige initiativ fått utarbeida ein Stadanalyse. Arbeidet er utført av Arkitektkontoret 4B i 2017 der bedrifter og private var med i workshops, analysen er tekstoppdatert i 2021 i høve endringar i perioden. Analysen ligg som vedlegg til dette innspelet. Primærfokuset til KN har vore å sjå på utviklinga av Kaupanger i forhold til næringslivet, og ha ein arealplan som stettar framtidige behov for eksisterande og nytt næringsliv. Likevel kjem me ikkje utanom at bustadutvikling, barnehage og skule er viktige faktorar både for den totale kvaliteten til bygda Kaupanger og næringslivet.