50-sone og rundkøyringar på Rv 5 gjennom Kaupanger (forslagstillar: FAU ved Kaupanger skule)

RV 5 splittar tettstaden Kaupangerskogen og hindrar god sentrumsutvikling. Vegen skapar også mykje støy og hindrar at barn og unge kan krysse vegen trygt, bruke bygda si fritt, og gå eller sykle til aktivitetar.

Ved å etablera ein rundkøyring ved ViteMeir som kan sikre trafikkfordeling til idrettsanlegg, bensinstasjon og næringspark, og ein ved dagens avkøyrsle mot næringsparken så kan ein bøte på nokon av konsekvensane av at vegen er plassert der den er.

To rundkøyringar kan gjere at ein også kan fjerne den trafikkfarlege avkøyrsla frå RV 5 mot Kaupangsenteret/Bjørkehagen som FAU har karakterisert som livsfarleg i sin gjennomgang av trafikktryggleik i Kaupanger skulekrets. I ei 50-sone kan det også etablerast fleire kryssingspunkt. Det er svært mange vegar i Kaupanger sentrum. Ved å gjera desse relativt enkle grepa så er det mogeleg å frigjere nokre areal og få til noko av den sentrumsutviklinga som moglegheitsstudiane peiker på, men på kortare sikt.

RV 5 kan bli lagt rundt Kaupanger ein gong i framtida, men forslaget om 50 km-sone og rundkøyringar på RV5 gjennom Kaupanger er eit tiltak som let seg realisera i løpet av få år. Prosjektet er lett å gjennomføra, men fordrar god dialog mellom kommune og vegvesen og vilje til å setja barn, unge og trivsel før bilisme i Kaupanger.