Bussparkering ved Ingafossen

I saksutgreiinga står det:
"Med ei etablering på Kvåle vil ein kunne utfordre fylkeskommunen til å etablere kombinert nattparkering og haldeplass under bakken på Ingafossen, med tilhøyrande stor miljøgevinst".
"Stor miljøgevinst" gjeld berre for Kvåle-alternativet. Kvifor blir det ingen miljøgevinst ved Trudvang-alternativet dersom fylkeskommunen byggjer bussgarasje ved Ingafossen?
Det blir vel mykje enklare å plassere bussparkering ved Ingafossen dersom det ikkje skal byggjast skule på same tomta?

Kombinasjon av underjordisk bussparkering og skule gjev store utfordringar med tanke på branntryggleik. Bussgarasjen må delast inn i brannsikre seksjonar som krev ekstra plass. I skissa er det vist 4 seksjonar under Kvåle stadion med plass til 5 bussar i kvar branncelle. Det ideelle er sjølvsagt ei branncelle for kvar buss for å avgrense skaden ved brann. I dag finst det ingen aktuelle metodar for å sløkkje brann i eit stort bussbatteri. Dersom hydrogen eller ammoniakk blir drivstoff for bussane i framtida, kan også drivstofflekkasje gje store utfordringar nær skulen.

Haldeplassen for av- og påstigning bør ikkje plasserast under bakkenivå. Kvilerom for sjåførane må sjølvsagt plasserast over terrengnivå.

Fjerning av 170 parkeringsplassar i dagen er lagt inn som ein føresetnad for barneskule på Kvåle. Det er god plass til å byggje underjordisk parkeringshus bak Sognahallen, men dette blir ein tilleggskostnad for Kvåle -alternativet. Riving av bygningane på Ingahaugen og utgraving av byggjegrop for parkeringshus og bussgarasje, vil stengje passasjen mellom Ingafossen og ungdomsskulen. Det gjev store utfordringar med busstrafikk gjennom Trolladalen i byggjeperioden.

Sjå fleire komentarar i notat som vart sendt til Postmottak 26. februar (motteke 27.2, men ikkje journalført pr. 3.3.)